Lied 5 – Al droevet die tijt ende die vogheline

door Hadewijch

Al droevet die tijt ende die vogheline,
Dan darf niet doen die harte fine:
Die dore minne wilt doghen pine
Hi sal weten ende kinnen al
-Suete ende wreet,
Lief ende leet-
Wat men ter minnen pleghen sal.

Die fiere, die daer toe sijn ghedeghen
Datsi onghecuster minnen pleghen,
Si selen in allen weghen daer jeghen
Stout sijn ende coene,
Ende al ghereet te ontfaen
Si troest, si slaen,
Van minnen doene.

Der minnen pleghen es onghehoert,
Alse hi wel kint dies hevet becoert,
Want si in midden den troest te stoert.
Hine can ghedueren
Dien minne gheraect:
Hi ghesmaect
Vele onghenoemder uren.

Bi wilen heet, bi wilen cout,
Bi wilen bloede, bi wilen bout,
Hare onghedueren es menichfout.
Die minne al maent
Die grote scout
Haerre riker ghewout,
Daer si ons toe spaent.

Bi wilen lief, bi wilen leet,
Bi wilen verre, bi wilen ghereet;
Die dit met trouwen van minnen versteet,
Dat es jubileren,
Hoe minne versleet
Ende ommeveet
In een hateren.

Bi wilen ghenedert, bi wilen ghehoghet,
Bi wilen verborghen, bi wilen vertoghet,
Eer selc van minnen wert ghesoeghet
Doghet hi grote avontuere,
Eer hi gheraect
Daer hi ghesmaect
Der minnen natuere.

Bi wilen licht, bi wilen swaer,
Bi wilen doncker, bi wilen claer,
In vrien troest, in bedwonghenne vaer,
In nemen ende in gheven,
Moeten die sinne,
Die dolen in minne,
Altoes hier leven.


door Hadewijch

Back to CONTENTS


tekstbron: DBNL
opgenomen in WEEKBLADEN #59 - WORG

Stuur uw bijdragen (enkel tekst aub, geen prentjes) voor de WEEKBLADEN naar weekbladen@radioklebnikov.be

Ontdek onze CD-collectie
op BANDCAMP!